यूएई विरुद्ध नेपालको पहिलो ऐतिहासिक जित

एसीसी महिला एसिया कप क्रिकेटमा नेपालले विजयी सुरुवात गरेको छ।

मिति: २०२४-०७-१९ , समय : २२:११:२९ , Our Pradesh

Our Pradesh

एसीसी महिला एसिया कप क्रिकेटमा नेपालले आफ्नो पहिलो विजयी सुरुवात गरेको छ।

यूएईले दिएको ११६ रनको लक्ष्यलाई नेपालले १६.१ ओभरमा ४ विकेटको क्षतिमा प्राप्त गरेको छ । नेपालका लागि ओपनर सम्झना खड्का ७२ रनमा अविजित रहिन् ।

खड्काले ४५ बलमा ७२ रन बनाइन् । टी-२० अन्तर्राष्ट्रिय क्रिकेटमा खड्काको यो पहिलो अर्धशतक हो । यस्तै, पूजा महतो ७ रनमा अविजित रहिन् ।

श्रीलंकाको धमुल्ला अन्तर्राष्ट्रिय रंगशालामा टस जितेर नेपालले पहिले ब्याटिङको निम्तो युएइलाई दिएका थिए। यूएईले नेपाल विरुद्ध निर्धारित २० ओभरमा आठ विकेट गुमाएर ११५ रनको योगफल तयार पारेको थियो ।

नेपाल विरुद्ध यूएईकी खुसी शर्माले सर्वाधिक ३६ रन बनाइन् । यस्तै, काविशा इगोडेजले २२, समाइरा धर्निधर्काले १३ र कप्तान इशा ओजाले १० रनको योगदान दिए ।

बलिङतर्फ नेपालकी कप्तान इन्दु बर्माले तीन विकेट लिइन् । चार ओभर बलिङ गरेकी इन्दुले १९ रनमात्रै खर्चिएर ३ विकेट लिएकी हुन् । यस्तै, कविता जोशी, सबनम राई र कृतिका मरासिनीले समान १-१ विकेट लिए ।

 

एसीसी महिला एशिया कप क्रिकेटमा नेपाल समूह ‘ए’ मा छ । यो समूहमा नेपालसँगै यूएई, भारत र पाकिस्तान छन् ।

 

 

प्रकाशित मिति: २०२४-०७-१९ , समय : २२:११:२९ , ९ महिना अगाडि

यहाँ कमेन्ट गर्नुहोस्
सम्बन्धित