प्रधानमन्त्री ओलीको चीन भ्रमणलाई ‘चाइना कार्ड’ को संज्ञा: प्रचण्डको अभिव्यक्ति आपत्तिजनक
मिति: २०२४-११-१६ , समय : १८:५४:११ , Our Pradesh
Our Pradesh
प्रधानमन्त्री ओलीको चीन भ्रमणलाई ‘चाइना कार्ड’ को संज्ञा: प्रचण्डको अभिव्यक्ति आपत्तिजनक
दक्षिण भारतबाट प्रकाशन हुने अङ्ग्रेजी दैनिक दि हिन्दू मा पूर्वप्रधानमन्त्री पुष्पकमल दाहाल ‘प्रचण्ड’ले दिएको अभिव्यक्तिले कूटनीतिक मर्यादा र नेपालको स्वाभिमानमाथि प्रश्न उठाएको छ। उनले प्रधानमन्त्री केपी शर्मा ओलीको आसन्न चीन भ्रमणलाई ‘चाइना कार्ड’ खेल्ने प्रयासको रूपमा चित्रण गर्दै आलोचना गरेका छन्।
प्रचण्डले अन्तर्वार्तामा भनेका छन्, “ओलीजी पहिलो दुईपक्षीय भ्रमणका लागि चीन जाँदैछन्। तर यो भ्रमण ‘चिनियाँ कार्ड’ जस्तो देखिन्छ, जुन गलत हो।” साथै, उनले भारतसँग नेपालको सम्बन्धलाई इतिहास, संस्कृति, र भूगोलको आधारमा गहिरो भनेका छन् र पहिलो विदेश भ्रमण भारतबाटै गर्नुपर्ने धारणा व्यक्त गरेका छन्।
प्रचण्डले पहिलोपटक प्रधानमन्त्री हुँदा चीनबाट आफ्नो पहिलो विदेश भ्रमण गरेका थिए। तर अहिले प्रधानमन्त्री ओलीको चीन भ्रमणलाई आलोचनाको निशाना बनाउँदै उनले आफूले नेपाल–भारत सम्बन्धलाई नयाँ उचाइमा पुर्याएको दाबी गरेका छन्।
नेपालका लागि भारतका पूर्वराजदूत निलाम्बर आचार्यले प्रचण्डको अभिव्यक्तिप्रति आपत्ति जनाउँदै भनेका छन्, “देशको प्रधानमन्त्री एउटा छिमेकी देशमा औपचारिक भ्रमणका क्रममा जाँदा अर्को छिमेकीलाई उक्साउने र आपसी सम्बन्धमा आशंका उत्पन्न गराउने अभिव्यक्ति दिनु आपत्तिजनक मात्र होइन, कूटनीतिक रूपमा राष्ट्रिय हितविपरीत पनि हो।”
भारतीय मिडियाले ओलीलाई चीनपरस्त वामपन्थी भन्दै नेपालका प्रधानमन्त्रीले पहिलो विदेश भ्रमण भारतबाट गर्ने परम्परा तोडेको भनेर प्रचार गरिरहेका बेला प्रचण्डको यस्तो अभिव्यक्तिले उनीहरूको पक्षलाई बल पुग्ने
देखिन्छ।
प्रकाशित मिति: २०२४-११-१६ , समय : १८:५४:११ , ५ महिना अगाडि
