रंगेलीमा खोला ठेक्का विवाद: कीर्ते बिलमा कारोबार, नगरप्रमुख बगडियाको कारबाही चेतावनी
मिति: २०२५-०१-०१ , समय : २१:२१:०७ , Our Pradesh
Our Pradesh
मोरङ ,रङ्गेली १७ पुस २०८१
मोरङको रंगेली नगरपालिकाले खोला उत्खननको ठेक्का लगाएको परियोजनामा ठेकेदार कम्पनीले बदनियतपूर्ण गतिविधि गरेको खुलासा भएको छ। रंगेली–१ स्थित को खोला रनकाली माता कन्ट्रक्सनले नगरपालिकाको नाममा कीर्ते बिल छापेर खोलाजन्य पदार्थको उत्खनन् र बिक्री गरिरहेको पाइएको छ।
सेतो रङको नक्कली बिल र पहिलो रङको आधिकारिक बिल
नगरपालिकाको कानुनी प्रावधानअनुसार, खोलाजन्य पदार्थको कारोबारका लागि नगरपालिकाको छाप भएको आधिकारिक बिल अनिवार्य भए पनि ठेकेदार कम्पनीले बिना छापको बिलबाट कारोबार गरेको छ।
कीर्ते बिलबाट राजस्व ठगीको आशंका
नक्कली बिल
ठेकेदार कम्पनीले चार ठेली अर्थात् चार सयवटा कीर्ते बिल छापेर बालुवा, गिटी, र ढुंगाको कारोबार गरिरहेको पाइएको छ। विशेषतः ट्याक्टर चालकलाई नक्कली बिल दिइँदै राजस्व छली गरिरहेको एक स्थानीयले बताए।
“ट्याक्टरहरूले अर्धकट्टी बिल देखाउँछन्। नगरपालिकाको छाप नलागेको बिलमा कारोबार गर्नु भनेको बालुवा-गिटी चोरीजस्तै हो,” स्थानीयले भने।
पालिकाद्वारा जारी गरिएको अधिकारिक बिल
यसले नगरपालिकाको राजस्व संकलनमा प्रत्यक्ष असर पर्नुका साथै नगरपालिकाको छविमा नकारात्मक प्रभाव परेको छ।
ठेकेदार कम्पनीको दाबी
रनकाली माता कन्ट्रक्सनका प्रतिनिधि रमेशकुमार रायले भने बिल डम्पिङका लागि मात्र छापिएको दाबी गरे। “हामीले स्टक राख्नका लागि चार सयवटा स्टिमेट बिल छपाएका थियौं। तीमध्ये डेढ सयजति बिलको मात्र प्रयोग भएको छ। अबदेखि आधिकारिक बिल मात्र प्रयोग गर्नेछौं,” रायले भने।
उनका अनुसार ग्रामथान गाउँपालिका–४ मोतिपुरमा डम्पिङ साइट बनाइएको छ। तर स्थानीयले डम्पिङ साइटबारे कुनै जानकारी नभएको बताएका छन्।
नगरप्रमुखको कडा चेतावनी
रंगेली नगरप्रमुख दिलीप बगडियाले नगरपालिकाको छाप भएको बिल प्रयोग नगरेको पाइएमा ठेक्का खारेजसम्मको कारबाही गर्ने चेतावनी दिएका छन्।
“ठेकेदार कम्पनीले नगरपालिकाको अनुमति लिएर वा छाप भएको आधिकारिक बिल प्रयोग गरेर मात्र कारोबार गर्नुपर्छ। नियम उल्लंघन भएको पाइएमा आवश्यक कदम चालिनेछ,” नगरप्रमुखले बताए।
नगरप्रमुखले ठेकेदार कम्पनीका प्रतिनिधिलाई नगरपालिकामा बोलाएर स्पष्टीकरण मागेको र दोहोर्याउने गल्ती भए कारबाही गर्ने चेतावनी दिएका छन्।
खोलाजन्य पदार्थको ठेक्कामा विवाद
रंगेली नगरपालिकाले लोहन्द्रा खोलाका विभिन्न स्थानमा उत्खनन र बिक्रीका लागि बोलपत्र आह्वान गरेको थियो। ३३ लाख ६४ हजार रुपैयाँको प्रारम्भिक अनुमान गरिएको ठेक्कालाई रनकाली माता कन्ट्रक्सनले ७७ लाख ३१ हजार रुपैयाँमा लिएको थियो।
तर, टेन्डर भर्ने क्रममा ठेकेदार कम्पनीले प्रमाणपत्र नबुझाएको र कीर्ते बिलबाट कारोबार गरिरहेको भन्दै अख्तियार दुरुपयोग अनुसन्धान आयोगमा उजुरी परेको छ।
नगरप्रमुख बगडियाका अनुसार, ठेकेदार कम्पनीले सबै प्रक्रिया पूरा गरेको भए पनि बिलको अनियमितताले ठेक्का विवादास्पद बनेको छ। “अख्तियारले यस विषयमा छानबिन गरिसकेको छ। यदि गम्भीर गल्ती भएको भए आयोगले कारबाही गरिसक्थ्यो,” नगरप्रमुखले भने।
समग्र स्थिति
रंगेली नगरपालिकामा खोलाजन्य पदार्थ उत्खननको ठेक्कामा ठेकेदार कम्पनीले कीर्ते बिलको प्रयोग गरी राजस्व ठगी गरेको आरोप गम्भीर बनेको छ। नगरप्रमुख बगडियाले यस प्रकरणमा कडा कदम चाल्ने प्रतिवद्धता जनाए पनि स्थिति थप जटिल बन्न सक्ने देखिएको छ।
प्रकाशित मिति: २०२५-०१-०१ , समय : २१:२१:०७ , ४ महिना अगाडि
