काठमाडौँमा गणतन्त्रवादी र राजावादीको शक्ति प्रदर्शन, सुरक्षा व्यवस्था कडा
मिति: २०२५-०३-२८ , समय : १०:३१:२२ , Our Pradesh
Our Pradesh
काठमाडौँ – काठमाडौँमा आज गणतन्त्र समर्थक र राजतन्त्र पक्षधर समूहहरूले छुट्टाछुट्टै शक्ति प्रदर्शन गरिरहेका छन्। सम्भावित झडपलाई ध्यानमा राख्दै सरकारले सुरक्षा व्यवस्था कडा बनाएको छ।
तिनकुनेमा राजावादीको प्रदर्शन
राजतन्त्र पुनर्स्थापनाका पक्षधर दलहरू तथा अभियन्ताहरूको अभियानले काठमाडौँको तिनकुनेमा प्रदर्शन गरिरहेको छ। राजसंस्था पुनर्स्थापनाका लागि सक्रिय नवराज सुवेदी नेतृत्वको संयुक्त जनआन्दोलन समितिले प्रदर्शनलाई आफ्नो समर्थन जनाउँदै सहभागी हुन सबैलाई आह्वान गरेको छ। साथै समितिले राजतन्त्र पुनर्स्थापनाको आन्दोलनको जनकमाण्डर दुर्गा प्रसाईलाई घोषणा गरेको छ।
यस प्रदर्शनमा राप्रपा, राप्रपा नेपाल लगायतका राजावादी दलहरूको सक्रिय सहभागिता रहेको छ। प्रशासनले राजावादीलाई रिङरोड हुँदै तिनकुनेमा सभा गर्न अनुमति दिएको छ।
गणतन्त्र पक्षधरको प्रदर्शन
चार दल सम्मिलित समाजवादी मोर्चाले गणतन्त्रको पक्षमा भृकुटीमण्डपमा सभा गरिरहेको छ।
माओवादी केन्द्र: माइतीघर, कुपन्डोल, त्रिपुरेश्वर, सोह्रखुट्टेबाट जुलुस
एकीकृत समाजवादी: शान्तिबाटिका, मैतीदेवीबाट जुलुस
विप्लव नेकपा: सुन्धाराबाट जुलुस
सुरक्षा व्यवस्था कडा
दुवै पक्षको प्रदर्शनलाई मध्यनजर गर्दै नेपाल प्रहरी र सशस्त्र प्रहरीका थप २,००० भन्दा बढी सुरक्षाकर्मी परिचालन गरिएका छन्। प्रशासनले संभावित अप्रिय घटनालाई रोक्न काठमाडौँका विभिन्न स्थानमा कडा निगरानी राखेको छ।
आजको प्रदर्शनले राजनीतिक वातावरण तातेको छ भने सुरक्षा चुनौती पनि बढ्न
सक्ने अनुमान गरिएको छ।
प्रकाशित मिति: २०२५-०३-२८ , समय : १०:३१:२२ , १ हप्ता अगाडि
