नोबेल अस्पतालमा बिरामीको मृत्यु, चिकित्सकीय लापरबाहीको आरोपमा मुद्दा दायर
मिति: २०२५-०४-०३ , समय : १७:५३:१२ , Our Pradesh
Our Pradesh
नोबेल अस्पतालमा बिरामीको मृत्यु, चिकित्सकीय लापरबाहीको आरोपमा मुद्दा दायर
विराटनगर – प्रतिनिधिसभा सदस्य डा. सुनील शर्माको नोबेल मेडिकल कलेजमा उपचाररत बिरामीको मृत्यु भएपछि चिकित्सकीय लापरबाहीको आरोपमा पीडित परिवारले मोरङ जिल्ला अदालतमा मुद्दा दायर गरेका छन्।
सुनसरी इनरुवाकी ५६ वर्षीया बिमला थापा पोखरेलको गलत उपचारका कारण ज्यान गएको भन्दै उनका श्रीमान् महेश्वर पोखरेलले क्षतिपूर्तिसहित न्यायको माग गरेका हुन्।
मोर्फिन सेवनपछि अवस्था बिग्रँदै मृत्युसम्म
फोक्सो तथा श्वासप्रश्वाससम्बन्धी समस्या लिएर नोबेल मेडिकल कलेजमा भर्ना भएकी बिमलाको उपचारका क्रममा सुधार हुँदै गएका बेला चिकित्सकले उनलाई ढाडको दुखाइ कम गर्न ‘मोर्फिन’ नामक औषधि सिफारिस गरेका थिए। परिवारका अनुसार, औषधि सेवन गरेपछि बिमलाको स्वास्थ्य अवस्था झन् जटिल बन्दै गयो, जसका कारण उनको ज्यान गयो।
पीडित परिवारको दाबीअनुसार, चिकित्सकहरूले सही ढंगले बिरामीको अवस्था मूल्यांकन नगरी अत्यधिक मात्रा (१५० एमजी) मा मोर्फिन औषधि दिएका थिए, जुन गम्भीर लापरबाही हो।
न्यायका लागि अदालतको ढोका
बिमलाका परिवारले यस घटनामा संलग्न चिकित्सकहरू डा. रामहरि घिमिरे र डा. रुपक केसीविरुद्ध अदालतमा मुद्दा दायर गर्दै पाँच करोड रुपैयाँ क्षतिपूर्तिको माग गरेका छन्।
अदालतमा दायर गरिएको फिरादपत्रअनुसार, गलत औषधि सिफारिस गर्नुका साथै बिरामीको अवस्था बिग्रँदै जाँदा पनि चिकित्सकहरूले आवश्यक उपचार नगरेको आरोप छ।
अस्पतालको प्रतिक्रिया
यस विषयमा नोबेल मेडिकल कलेज एन्ड टिचिङ हस्पिटलका महाप्रबन्धक दिपेश राईले अस्पतालले घटनालाई गम्भीर रूपमा लिँदै अनुसन्धान गरिरहेको बताएका छन्।
यसैबीच, अदालतले उपभोक्ता अधिकार संरक्षण ऐनलगायतका कानुनी आधारमा मुद्दा दर्ता गरेको छ। यो घटनाले नेपालमा चिकित्सकीय लापरबाहीसम्बन्धी कानुनी लडाइँको नयाँ दृष्टान्त
प्रस्तुत गरेको छ।
प्रकाशित मिति: २०२५-०४-०३ , समय : १७:५३:१२ , १ दिन अगाडि
