उमा–गौरी सहकारी ठगी प्रकरण: मुख्य अभियुक्त अझै फरार
मिति: २०२४-१२-२० , समय : २१:४५:२६ , Our Pradesh
Our Pradesh
उमा–गौरी सहकारी ठगी प्रकरण: मुख्य अभियुक्त अझै फरार
मोरङ, धनपालथान
मोरङको धनपालथान गाउँपालिकामा रहेको उमा–गौरी कृषि सहकारीको २२ करोड रुपैयाँ हिनामिनामा मुछिएका २५ जना अभियुक्त अझै फरार रहेका छन्। प्रहरीले जारी गरेको पक्राउ पुर्जीका बावजुद सहकारीका प्रमुख पदाधिकारीसहित अन्य अभियुक्तहरूलाई पक्राउ गर्न नसक्दा पीडितले प्रहरीमाथि मिलेमतोको आशंका व्यक्त गरेका छन्।
प्रहरी अनुसन्धानका आधारमा गत बिहीबार मोरङ जिल्ला अदालतमा २६ जना अभियुक्तविरुद्ध मुद्दा दायर भएको थियो। तीमध्ये रोशन राजवंशी पक्राउ परेका छन् भने बाँकी अभियुक्तहरूमध्ये धेरैजसो भारतमा लुकेर बसेको अनुमान गरिएको छ।
ठगी प्रकरणका मुख्य अभियुक्त
सहकारीका अध्यक्ष शम्भु रौनियार, उपाध्यक्ष लक्ष्मण साह रौनियार, र सचिव आलम अन्सारी मियाँविरुद्ध ठगीको आरोपमा २२ करोड बिगोसहित मुद्दा दर्ता गरिएको छ। यसैगरी, संसद्को सार्वजनिक लेखा समिति सभापति ऋषिकेश पोखरेलकी पत्नी अञ्जला कोइरालाको संलग्नता पनि प्रमाणित भएपछि उनीमाथि पनि मुद्दा चलाइएको छ।
सहकारी पीडितहरूको गुनासो
उक्त सहकारीले नबिल बैंक र आरएसडीसी लघुवित्तबाट २४ करोडभन्दा बढी ऋण लिएको थियो। तर, ऋणको ठूलो हिस्सा सहकारीका पदाधिकारीहरूले नै हिनामिना गरेको खुलेको छ। ऋणीका नाममा धितो राखेर लिएको रकमको आधा मात्र सम्बन्धित व्यक्तिहरूलाई दिएको र बाँकी रकम सहकारी सञ्चालकहरूले नै दुरुपयोग गरेको अनुसन्धान प्रतिवेदनले देखाएको छ।
अनुसन्धानमा प्रहरीको प्रतिबद्धता
जिल्ला प्रहरी कार्यालय मोरङका प्रवक्ता डीएसपी वेद जोशीका अनुसार, फरार अभियुक्तहरूको खोजी कार्य तीव्र बनाइएको छ। ‘अभियुक्तहरूको भारतमा लुकेर बसेको अनुमान छ, त्यसैले खोजी कार्यलाई तीव्र बनाएका छौं,’ डीएसपी जोशीले भने।
पाँच हजार सेयर सदस्य प्रभावित
२०७२ देखि २०७८ सम्म सञ्चालक समिति सदस्य रहेकी कोइरालाको हस्ताक्षरबाट सहकारीले कर्जा लिएको प्रमाण अभियोगपत्रमा समेटिएको छ। सहकारीले आफ्नो ऋण फिर्ता गर्न नसक्दा करिब पाँच हजार सेयर सदस्यहरू आर्थिक रूपमा प्रत्यक्ष प्रभावित भएका छन्।
पीडितहरूले सहकारीको बिगो असुल र दोषीलाई कानुनी कठघरामा उभ्याउन स
रकारसँग माग गरेका छन्।
प्रकाशित मिति: २०२४-१२-२० , समय : २१:४५:२६ , ४ महिना अगाडि
